Davao City – Nagpakatag na og dugang pa nga mga pulis ang Davao City Police Office (DCPO) sa Magsaysay Park human nidagsa ang mga tawo sa opisina sa Commission on Elections (COMELEC) sa nagpadayong voter’s registration nga matapos karong Setyembre 30, 2021.
Gibutyag ni Police Col. Kirby John Kraft, DCPO City Director, nga iyahang gimanduan si Sta. Ana PNP station commander Police Major Benkalin Baluan nga sigurohong hapsay ug nasunod sa mga adunay transaksyon ang health protocols ilabina ang social distancing.
Matud ni Kraft giimplementar ang queuing ug gikinahanglan kadtong aduna ray mga priority numbers aron limitahan ang mga tawo sa sulod sa Magsaysay Park.
Samtang nanawagan si Commission on Elections (COMELEC) Asst. Regional Director Atty. Gay Enumerables sa publiko nga kung dili man lang pagparehistro, transfer o importante ang tuyo sa sulod sa COMELEC Davao dili na lang musagol sa kadaghanon sa mga tawo sa opisina.
Nagpatabang na ang COMELEC Davao sa PNP sa pag-imposar sa peace and order ug health protocols sa ilahang opisina.
RadyoMaN Aimee Guinita
