Davao City- Gipasalamatan ni Davao City Police Office City Director Police Senior Superintendent Alexander Tagum si Mayor Inday Sara Duterte-Carpio tungod sa gihatag nga bag-ong mga mobile patrol.
Gipadayag ni Tagum ang iyang dakong pasalamat kang Mayor Inday gumikan sa suporta nga gihatag niini ngadto sa kapulisan sa dakbayan pinaagi sa gidonar nga mga mobile patrol.
Alayon niini,gitambungan ni Assistant City Administrator for Operations Atty. Lawrence Bantiding isip representante sa Mayora ang turn-over ceremony sa 14 ka bag-ong mobile patrol nga gihimo sa Camp Captain Domingo Leonor.
Gisulti ni Bantiding, mukantidad og kapin usa ka milyon ka pesos ang matag usa sa mobile patrol kun muabot sa kapin 21 milyones ka pesos ang kinatibuk-an nga kantidad.
Gawas niini, naghatag usab ang lokal nga kagamhanan og mga drivers lakip na ang petrolyo sa mga bag-o nga mga behikulo.
Ipanghatag sa dose ka mga police stations ang nasangpit nga behikulo ug tag-usa sab sa Traffic Group ug sa Davao City Public Safety Company.
Matud ni Tagum, wala na’y rason ang mga precinct commanders nga dili makapatrolya o makaresponde karon nakadawat sila og bag-ong mobile patrol.Diin lauman ang pagpalad sa police visibility ug pagmuntar og daghan checkpoints sulod sa pito ka adlaw isip kabahin sa pagpalig-on sa hugot nga siguridad sa siyudad batok sa mga kriminal.
Kabahin sa gipangandaman sa DCPO sa lig-on nga pagbantay mao ang taliabot nga Kadayawan Festival 2017 sunod bulan.
Kasamang Joel Viray
