Davao City – Kooperasyon ang gipanawagan karon sa Davao City Police Office (DCPO) ngadto sa publiko sa pagtuman sa sistema ug patakaran atol sa Kadayawan Festival ug uban pang dagkong aktibidad dinhi sa syudad sa Davao.
Sa interbyu sa DXDC RMN Davao kang DCPO Director Police Senior Superintendent Alexander Tagum, gibutyag niini nga angay masayud ang publiko labi na ang mga bisita nga istriktong i-implementar ang pagdili sa pagsuot og backpack, kalo ug jacket sa mga pampublikong lugar labi na sa mga inspection areas.
Gipasabot ni Tagum nga ang maong mga butang ang sagad ginagamit sa mga terorista ug dautang indibidwal aron itago ang ilang pagkatawo.
“Nganong nagpatuman ta sa ingon ana nga mga policy because mao man gud na ang ginagamit nga modus operandi sa mga terorista, gamit ang jacket, gamit ang bag, gamit ang kalo para mataguan ang ilang mga identity,” saysay ni Tagum.
Dugang sa DCPO Director nga importante ang pagtuman sa maong mga patakaran aron malinawon ang pasuroy ug pagsaksi sa katawhan sa mga kalingawan sa dakbayan.
RadyoMaN Kirby Manzon
