Davao City – Mas gipangandaman sa kapulisan ang security plan sa umaabot nga Kadayawan Festival karong Agosto, 2019.
Sumala ni DCPO spokesperson Police Captain Ma. Teresita Gaspan atol sa AFP-PNP Presser nga bisan pa man kada tuig na ang paghan-ay sa seguridad sa maong aktibidad ug templated na ang plano, dobleng gipangandaman sa otoridad ang seguridad sa Kadayawan.
“Nag prepare gyud mi og more than sa usual security plan tungod sa kadako sa activity, month long celebration from August 1 to end of August,” segun ni Gaspan.
Dugang niini nga anaa sa apin kun kulang 3,000 ka mga pulis ang i-deploy sa nasangpit nga selebrasyon apan matud sa tigpamaba nga madungagan pa ang maong ihap tungod aduna pay laing security forces nga i-deploy sa mga strategic areas ingon man sa mga dagkong aktibidad sa Kadayawan.
Samtang karong umaabot nga August 2, 2019, adlaw’ng Biyernes, opisyal na nga pagaabrihan ang maong pagsaulog pinaagi sa pagpahigayon og Misa Pasasalamat alas 3:30 sa hapon sundan sa Sugbang Sinugdanan ug Pag-abli sa Kadayawan nga magsugod 4:30 sa hapon sa Magsaysay Park.
RadyoMaN Renz Barbarona
