Sa interbyu sa DXDC RMN Davao kang Police Major Ma. Teresita Gaspan, Spokesperson sa DCPO ug Office in Charge (OIC) sa DCPO Women and Children Protection Desk (WCPD), gibutyag niini nga sagad rason sa pagbawi sa kaso mao ang pagka-dependent sa asawa tungod kay ang iyang bana maoy nagbuhi sa pamilya, ilabina gyud kung sila adunay mga anak.
“Kasagaran, mas daghan ang cases nga ni-withdraw kay tungod nga mag-settle nalang. Mamahimong magpa-blotter nalang sila sa maong panghitabo kay eventually magamit man gihapon nila kung decided na gyud sila mo-file ang kaso kay habitual na ang pang-abuso,” butyag ni Gaspan.
Matud ni Gaspan, sagad sa mga kasong mapasang-at kabahin sa Violence Against Women & their children mao ang rape, acts of lasciviousness, physical abuse (Republic Act 9262), psychological abuse, ug economic abuse, diin aduna usay pipila nga padayon ug hingpit nga gipasaka ang kaso.
Sa datus sa WCPD, sa Enero 2021 anaa sa siyam (9) ka mga kaso ang napaabot sa buhatan, ug mikunhod lamang og usa ka kaso karong tuiga, diin anaa sa walo ka kaso nga natala sa Enero 2022.
Padayong gi-awhag ang mga kababayen-an ingon man ang mga kabataan sa pag-report sa maong mga insidente sa pinakaduol nga police station aron kini gilayong maaksyonan.
RadyoMaN Kirby Manzon
