Davao City – Hingpit na nga gimando ni Davao City Police Office (DCPO) Director Col. Kirby John Kraft ang ‘full alert status’ sa tibuok syudad subay sa umaabot nga Kalag-Kalag karong adlaw’ng Biyernes ug Sabado.
Gidid-an ni Kraft ang iyang mga ginsakpan nga mag-leave karon nga semana aron adunay igong puwersang magbantay sa katawhan nga moduaw sa mga sam-ang denhe sa dakbayan.
Dugang ni Kraft nga karong adlawa, sugdan ang pag-deploy sa 50% sa mga pulis ug ang 100% sa petsa 31 karong bulana uban sa puwersa gikan sa PRO-XI, Task Force Davao, military ingon man mga force multipliers.
Lauman usab ang hugot ug istrikto nga seguridad sa Wireless Cemetery tungod sa pagduaw ni Pres. Rodrigo Duterte sa lubnganan sa iyang mga ginikanan nianang mga adlawa.
Matud sa opisyal, aduna usab sila’y i-montar nga Help Desk suld sa mga sementeryo aron adunay kaduolan ang mga tawo ilabi na kun adunay mga bata nga mawala.
Gipasalig niini nga luwas gikan sa hulga sa terorismo ug sa bisan unsang pagsabwag sa mga kagubot kun kaguliyang ang Kalag-Kalag sa tibuok dakbayan.
Ang pahimangno ni Kraft ngadto sa publiko mao nga dili magdala og backpack,hait nga mga butang, sigarilyo, bino, karaoke ug uban pang gidili suld sa mga sam-ang.
Gi-awhag ni Kraft ang katawhan nga sundon ang tanang mga ordinansa sama niadtong nagdili sa pagpanigarilyo ug pag-inom inom diha sa mga pampublikong lugar sama sa mga sementaryo aron dili dakpon ug pamultahon.
RadyoMaN Joel Viray
