Davao City – Andam na ang kapulisan alang sa umaabot nga Kalag-Kalag sa bulan sa Nobyembre.
Sa gipahigayong AFP-PNP presser, gibutyag ni Davao City Police Office (DCPO) Spokesperson P/Sr. Insp. Ma. Teresita Gaspan, tulo ka layer ang ilang ipatuman nga seguridad sa dakbayan ilabi na sa 58 ka mga major cemeteries aron magpabilin ang kahapsay ug kalinaw.
Segun ni Gaspan, ang inner layer ang magbantay ingon man mag monitor sa sitwasyon sulod sa mga sementeryo, ang middle layer maoy muatiman sa dagan sa trapiko aron malikay ang traffic congestion ilabi na sa gawas sa mga sementeryo samtang magpatuman og hugot nga checkpoint.
Nagpahimangno usab ang tigpamaba sa mga gidili sulod sa sementeryo sama sa mga hinagiban, pagpatugtog og kusog, gambling paraphernalia ingon man ang pagdala og bino.
Samtang, gi-awhag niini ang katawhan nga kung mamahimo dili lang magsabay sa pag-adto sa sementeryo ug adunay mabilin o mubantay sa tagsa-tagsa ka mga panimalay aron malikay sa kawat.
“Dili lang pod ta mag post sa social media kung asa ta muadto kay basin ma-trace sa mga kawatan,” dugang ni Gaspan.
Sa kinatibuk-an, adunay 214 ka mga sementeryo sa dakbayan gani gipaniguro sa kapulisan nga adunay mga personahe ang mag bantay sa malinawong Undas 2018.
RadyoMaN Jason Amisola
