Davao City – Gibutyag ni Davao City Police Office (DCPO) Spokesperson Police Senior Inspector Maria Teresita Gaspan nga walay intention ang duha ka pulis nga pasakitan ang tulo ka minor-de-edad nga nadakpan human nagriot niadtong Enero 21 sa gabii sa may Barangay 19-B.
Sumala ni Gaspan, tumong lang unta sa duha nila ka pulis nga nagranggo og PO1 nga disiplinahon ang mga menor-de-edad human nagyagayaga ug wala nagrespeto ngadto kanila.
Bisan og dili tuod tuyo sa duha ka pulis nga dapatan ug silotan ang tulo ka menor-de-edad sulod sa barangay hall sa Barangay 19-B apan dili gihapon buot i-tolerate sa DCPO ang ilang nahimo.
Wala matud pa magkulang ang DCPO sa pagmaymay sa kapulisan mahitungod sa ilang trabaho ug ang sakto nga pagdakop sa mga gikunsidera nga’ Children in Conflict with the Law.’
Suma ni Gaspan, matag adlaw ginapahinumdoman ang ilang mga sakop sa sakto nga tratamento sa pagsikop sa mga minors apan wala kini masunod sa duha ka pulis human nadala sila sa ilang gibati nga kasuko mao napasipad-an gayod nila ang mga batan-on.
Human nakuhaan og video sa CCTV camera sulod sa barangay hall sa Barangay 19-A ang pagpamunal sa duha ka pulis sa nagluhod nga mga menor-de-edad nga karong adlawa ilusad ang re-training course ngadto sa mga bag-ong pulis.
Suma ni Gaspan, partikular ipaubos sa retraining ang mga nagranggo og PO1 ug nadestino sa Mobile Patrol Group hilabi na nga sila maoy front-liner sa pagpanakop sa mga minors uban sa auxiliary police.
Dugang sa opisyal nga mamahimong facilitator sa re-training course sa mga pulis karong adlawa ang Public Attorney’s Office 11 head nga si Atty. Calatrava.
RadyoMaN Joel Viray
