DCPO-TEU: “Human error’ nag-unang hinungdan sa disgrasya sa kadalanan

Davao City – Human sa sunod-sunod nga disgrasya sa kadalanan nga natala sa Davao City, gibutyag sa DCPO Traffic Enforcement Unit (TEU) nga ‘human error’ gihapon ang nag-unang rason niini.

Sa interview sa DXDC RMN Davao kang TEU Chief Police Major Dexter Domingo gisulti niya, ang pinakaunang hinungdan sa mga disgrasya mao ang sayop sa driver, sama sa mga naga-drive nga hubog, kusog ang padagan ug mag-overtake o mangilog og dalan, ikaduha, ang pagbalewala sa mga traffic signs ug pagkadaot sa makina samatang nagbiyahe.

Giingon ni Domingo, sagad sa mga nalambigit mao ang mga private vehicles sama sa nahitabo niadtong Agusto 29, 2023, nga dakong disgrasya sa Diversion Road, Maa diin pipila sa mga nalambigit mao ang mga pribadong sakyanan.

Hinuon, gikan Agusto 2023 wala pa’y natalang namatay tungod sa mga disgrasya sa kadalanan , maong pahimangno sa DCPO-TEU nga sa kanunay mag-amping kay ang disgrasya sa kadalanan dili matag-an.

RadyoMan Ivy Parido