DCPO-TEU: Saktong imbestigasyon ug ebidensya siguraduhon bag-o makasohan ang responsable sa mga disgrasya sa kalsada

Davao City- Gipaklaro sa Davao City Police Office Traffic Enforcement Unit (DCPO-TEU) nga muatubang una sa pagsupak sa ‘yield on pedestrian’ ang atubangon sa mga driver nga mapamatud-ang kusog ang padagan ug dili manghatag og dalan sa mga tawong buot mutabok sa mga pedestrian lane.

Sa interview sa DXDC RMN Davao kang TEU Chief, Police Major Dexter Domingo, gibutyag niya nga warning ug multa una ang ipahamtang niining mga badlungon sa kalsada apan kung ugaling sila makabangga na, posible silang pasakahan og kasong reckless imprudence resulting to multiple damage of property, physical injury o ang mas bug-at nga reckless imprudence resulting to homicide.

Hinuon, gihatagan og katin-awan ni Domingo nga muagi pa kini og lawom og sakto nga imbestigasyon una masulti kung kinsa ba gyud nga responsable sa maong disgrasya, ang nabanggaan ba o ang nakabangga.

“Ang makakapagsabi po kung sinong may sala ay ang korte hindi po ang kapulisan o kung sino man ang imbestigador kasi magdedepende po ang korte sa ebidensyang ibibigay o kinonduct na pag iimbestiga ng ating kapulisan,” segun ni Domingo.

Pahinumdom kanunay sa TEU sa mga drivers nga magmatngon ilabi na sa mga pedestrian lane o intersection ug sa katawhan usab nga magbantay diha sa pagtabok og pagbaktas sa kalsada.

RadyoMan Ivy Parido