Davao City – Nangayo og despensa si Davao City Water District Spokesperson Atty.Bernard Delima sa ilang mga customers nga maapektohan sa kapin 24 oras nga water interruption sugod sa 10:00 sa buntag karong Enero 19 kun adlaw’ng Biyernes.
Nasayran, maglusad ang Department of Public Works and Highway Davao Region og bridge expansion project sa may Diversion Road ug maigo ang main pipeline sa Water District nga maoy hinungdan sa water interruption.
Giingon ni Atty.Delima nga usa ka adlaw ang trabaho sa bridge expansion ug human niana gilayon mubalik ang suplay sa tubig sa mga lugar nga nailawom sa line one sama sa Matina, Diversion Road, ug Ma-a apan walay labot ang Bangkal ug Bankerohan.
Dugang sa tigpamaba ang mga kunsumante sa Buhangin magpaabot og 36 oras ayha masuplayan og tubig, samtang 60 oras sa Lanang area ug 90 oras sa Sasa area nunot mas habog ang mao nga lugar.
Nasuta nga dili dayon makasaka nga makadagayday ang tubig sa mga pipeline sa mao nga lugar tungod sa recovery pressure ayha pa makatilaw og suplay sa tubig ang mga konsumante sa mao nga mga lugar.
Dili matud pa kaigo ang tulo ka water tanker sa Water District sa pagsuplay og tubig sa apektadong mga customers busa gipahimangnoan ang publiko nga magpundo og tubig una mawala ang presyur sa tubig sa adlaw’ng Biyernes.
RadyoMaN Joel Viray
