Davao City – Gitin-aw karon sa Davao City Water District nga niadto pang buwan sa Agosto ilang gituman ang mga rekumendasyon sa Commission on Audit Davao Region.
Sumala ni DCWD Spokesperson Atty. Bernard Delima nga human nilang nadawat ang COA report duha na ka bulan nakalabay gilayon ila kini gisanong dayon.
Una nang gisulti sa COA report nga wala nagbaton og transparinsiya ang DCWD sa giimplementar nga mga proyekto, mga programa, ug mga aktibidad nga giimplementar dinhi sa siyudad sa Dabaw.
Apan giklaro ni Delima nga hagbay ra nila kini gisanong lakip na ang pagbutang og bulletin sa tanang mga proyekto ug mga programa sa ingon madayag ug walay matago sa publiko.
Makita sa mga signboard, mga bulletin, ug sa website ang kumpletong detalye sa kasamtangan nga mga proyekto ug mga programa nga ilang gipatuman palibot sa syudad.
Gani matag karon ug unya gina-update usab sa website sa DCWD aron masiguro nga dili maulahi ang publiko sa mga katikaran sa mga proyekto ug mga programa sa nasangpit nga buhatan.
RadyoMan Joel Viray
