Davao City- Walay naka-schedule nga mga water interruptions dinhi sa syudad sa Davao karong pasko o kutob Disyembre ning tuiga.
Kini ang gibutyag sa tigpamaba sa Davao City Water District kun DCWD nga si Atty. Bernard Delima atol sa interview sa DXDC RMN Davao kaniya apan dili nila masiguro nga walay emergency interruptions nga mahitabo.
Subay sa mga nasinatian sa mga konsumante sa pipila ka mga area dinhi sa dakbayan sa mawala-wala nga supply sa tubig sama nalang sa Bajada ug Sasa, gibutyag ni Delima ang rason diin sumala niya tungod usab kini sa ginapahigayong power interruptions sa Davao Light sa may Bago Gallera tungod usab sa overloading sa power diin maapektuhan ang production well sa DCWD sa Bago nga naga-supply og tubig sa line 2, linya nga nagasubay sa Diversion Road padung sa Panaroma reservior nga naga-supply og tubig sa may Bajada, Buhangin ug Sasa.
Dugang saysay ni Delima nga bisan mubalik na ang kuryente, dili pa dayon makasaka ang tubig sa Panaroma reservoir hinungdan nga low pressure ngadto sa walay tubig ang masinatian sa mga konsumante.
Sa karon, nakigkoordinar na ang DCWD ngadto sa DLPC kabahin sa maong mulo gani padayong awhag sa DCWD ngadto sa mga konsumante nga kanunay magpondo og tubig ilabi na usab nga dili malikayan nga dunay mga emergency water interruptions nga mahitabo.
RadyoMan Renz Barbarona
