PALO, LEYTE – Sumakob ha Leyte Metropolitan Water District (LMWD) Office ha Nula-Tula, Tacloban City hira Chairman of the Board Leyte Teodoro de Veyra, Adolfo Olaya ngan iba pa daw nga empleyado han LMWD nga naugop ha Leyte Province, alas 3:00 han umagahon kakulop.
Ginkuha nira an server, mga parte han computer ngan iba pa.
Ha Eksklusibo nga interview han RMN kan de Veyra, sumala ha iya, ini in para maging operational na an opisina nira ha Leyte Academic Center ngan didto na makagbayad an mga taga konsumo han tubig.
“Kinahanglan kita hin baga timing han pagkadto pagpull-out hito nga mga files or records ngan importante ito hin duro nga nakuha ngadto kay para full-operation na gud iton pag-opisina dinhi ha LAC.”
Kinahanglan alas 3:00 han umagahon hira pumakadto sumala kan de Veyra.
“Kinahanglanon ito kay maaram man kamo nga bisan previously ginsisinamok gud nira didto. [Kakulop] ngani pagpull-out namon didto nagkaguliyang na an mga tawo ngadto kay mabarikada na ha LMWD didto [ha Nula-Tula].”
Sumala naman kan LMWD Information Officer Tess Pascua, robbery an nagawas hini nga ginbuhat nira de Veyra.
“Siguro amu ito, the fact nga gab-i nira ginbuhat baga robbery gud ini.”
Siring naman ni de Veyra, andam hira atubangon ini.
“Kun ano iton ira aksyon nga pagbubuhaton, andam kami hin baga pag-atubang tungod nga klaro dida han desisyon han aton korte nga kami an legal, an Provincial Board appointed.
