President Roxas, Capiz – Wala gid makasalbar ang 24 – anyos nga lalaki matapos nga ma-aksidente sa ginasakyan motorsiklo pasado alas 9 sang gab-i sa Poblacion Swa, President Roxas, Capiz.
Nakilala ang biktima kay Cybon Kent Castillo Dolor, residente sang nasambit nga lugar. Ini ang nag-angkon sang patal nga pilas sa iya ulo bangud nga nabunggo gid ang ginamaneho sini nga motorsiklo sa railings.
Nagaguha sa imbestigasyon sang mga kapulisan sa banwa sang President Roxas nga ginasubay sang nasambit nga biktima ang karsada padulong sa Barangay Lantangan, Pontevedra, Capiz sang wala sini makontrol ang manibela sang ginamaneho nga motorsiklo kag nasangit sa railings malapit sa eskwelahan kabangdanan sang pagkatumba kag paglampos sini.
Gintinguhaan panga dal – on sa ospital sang mga nagresponde nga ambulansiya kag katapo sang BFP ang amo nga biktima apang ini ang gindeklarar sang doktor nga dead-on-arrival.
Nahibaluan nga ginhulaman gid lamang sang amo nga biktima ang motorsiklo nga iya ginamaneho.
