Tapaz, Capiz- Blangko pa tubtob sa subong ang mga kapulisan sa banwa sang Tapaz angut sa kun sin-o ang suspek sa pagluthang sa isa ka persona sa amo nga banwa alas 7:45 sang gab-e.
Patay ang biktima nga ginkilala kay Ronald Bianeza y Vallente, 45-anyos sang Poblacion, Tapaz matapos nga nag-angkon sang pilas sa nalikod sini nga porsyon sang iya lawas.
Nahibaluan nga base sa inisyal nga imbestigasyon sang mga kapulisan, halin ang amo nga biktima sa videoke bar malapit sa San Jose Bridge.
Ginsunod ini sang suspek antes nga ginluthang samtang nagasakay sa motorsiklo. Ini pa ang nakapapalagyo, apang bangud sa pilas nga naangkon ini ang dalayon nga natumba mga 50-metros nagikan sa lugar nga siya ang ginpalukpan.
Gintinguhaan pa ini dal-on sa ospital, apang gindeklarar nga dead on arrival.
Ginatumod pa sang mga otoridad ang motibo sang krimen.
