Pilar, Capiz – Patay ang isa ka persona sa bunggoanay sang ginasakyan sang mga ini nga motorsiklo alas 8:15 sang aga sa Morcita Village Brgy Santa Fe, Pilar, Capiz.
Gindeklarar nga dead-on-arrival sa Jesus Colmenares District Hospital ang suspect/driver nga si John Rey Campos y Malata, 28-anyos ang pang-edaron sang Brgy San Ramon, Pilar matapos nag-angkon sang kapilasan sa lawas kag ulo.
Base sa imbestigasyon sang mga kapulisan, ginasubay sang 16-anyos nga si Rymwel Aplomina y Bandies sang Sitio Kalubihan Brgy Casanayan, Pilar, Capiz ang Block 17 sang Morcita Village apang sang pagtabok sa Block 18, gulpi ini nga ginbunggoan sang motorsiklo nga ginamaneho ni John Rey Campos.
Bangud sa impact, nagtabog gid si Campos sa ginasakyan nga motor kag lumampos ang ulo sini sa sementado nga dalan.
