Davao City- Nunot sa brutal nga pagpatay kang Barbie Inocencio kinsa gitohoang ang naghimo sa krimen mismo ang step-father nga si Richard Gumilid nga karelasyon sa inahan sa biktima, subling gipamugos karon sa Pastor Auxiliary Champlain Association International nga panahon na aron buhion pag-usab ang silot kamatayon sa pilipinas.
Matud sa Presidente nga si Dr.Ariel Coleto, mahunong lang ang heinous crime kun ngilngig nga krimen sama sa pagpatay sa bisan asang lugar sa nasud kung dunay magpatigbabaw nga death penalty nga ihamtang sa mga kriminal nga walay kaluoy mupasila sa kinabuhi sa mga inosente sama ni Barbie.
Gibarugan ni Dr.Coleto nga makapalisang sa mga kriminal ang silot kamatayon nga sa dugay’ng panahon giwagtang sa pilipinas nga maoy rason ngano walay hunong ang pagsulpot sa mga heinous crime sa Pilipinas.
Ang kamatayon ni Barbie ug sa ubang mga biktima sa heinous crime sa kinatibuk-ang kapupod-an maka-alarma na kay nagpadayag lang kini nga walay kasigurohan ang mga inosente sa ilang kaluwasan ug sa bisan unsang orasa puwede silang mabiktima sa ngilngig nga krimen.
Gipangatarungan ni Dr.Coleto nga walay sayop ug dili supak sa kabubut-an sa Dios ang death penalty kay gani bisan sa balaang kasulatan aduna nama’y mga tawong gisilotan og kamatayon gumikan sa krimen nga ilang gibuhat niadtong panahona.
Busa, ang labaw’ng gikinahanglan sa pilipinas karon mao ang silot kamatayon aron matuldukan na ang mga panghitabong heinous crime sa ingon wala na’y mga inosidente sama ni Barbie Inocencio ang mabiktima sa ngilngig nga krimen sa atong katilingban.
RadyoMan Joel Viray
