Davao City – Ang kahinay sa sistema sa hustisya ang matumbok nga dakung rason nganong ang mga organized kidnapping groups walay kukahadlok modagit aron ipalukat sa dakung kantidad or bin ba kaha kuhaan og internal organs aron ibaligya ngadto sa black market sa taas nga presyo alang sa mga tawong nanginahanglan niini.
Gibarugan karon ni Presidential Anti-Corruption Commission chairman Dante Jimenez ang dakung panginahanglan nga banhawon ang death penalty isip silot sa mga kidnappers ug sa mga notadong kriminal.
Matud ni Jimenez, anaa usab ang dakung panginahanglan nga ayuhon ang sistema sa hustisya aron mapadali ang pagtunol og crime resolution ngadto sa mga pamilyang nawad-an og kabanay gumikan sa nagpadayong krimen.
Aminado si Jimenez nga lisod masumpo ang krimen sama sa kidnapping dinhi sa nasud tungod kay pipila sa mga awtoridad ug mga anaa sa gobyerno involved man sa sinindikatong buhat sama sa paghatag og protection ngadto sa mga dautan.
Dugang ni Jimenez nga anaa usab ang scenario diin hasta mga nagpadagan sa hukmanan kaya ra kaayong bayran ug hayloon sa mga organized crime syndicates nga nag-operate sa nasud.
Daku ang pagtoo karon sa kanhi Volunteers Against Crime and Corruption (VACC) president nga ang tubag sa walay hunong nga ngilngig nga mga krimen sama sa kidnapping mao ang capital punishment sanglit magpugos kini sa mga kriminal nga mubati og kahadlok.
Tambag sa PACC chairman nga gikinahanglan dili mag-inusara ug dili usab magpagabii og uli ug kun makamatikod nga may gasunod-sunod nga behikulo, gilayong motawag or modangop ngadto sa kapulisan aron sa ingon masanta dayon ang dautang plano sa mga tawong luwan sa ‘mystery vans.’
RadyoMan Joel Viray
