Davao City – Human napulihan ni kanhi Presidente ug karon House Speaker Gloria Arroyo si Pantaleon Alvarez sa House speakership, nisila-ob ang komon na kaayong sugyot nga pagpabanhaw sa silot-kamatayon kun death penalty bill nga unang napalong sa hawanan sa Kongreso.
Ang proposed reimposition sa death penalty suportado usab ni First District Councilor Nilo Abellera, Jr, kinsa nagpangagot ngadto sa mga suspek nga miyabo og asido sa nawong sa 16 anyos nga dalagita didto sa Lapu-Lapu City, Cebu ingon man brutal nga nag-rape ug nagpatay sa usaka singko anyos nga batang babaye sa South Cotabato diin nisangpot kini sa subling pagkatawo sa panawagan nga banhawon pag-usab ang bitay or silya-elektrika.
Usa si Abellera sa daghang nagpalanog sa ilang pag-hiuyon nga balikon sa makausa pa ang death penalty sa nasud diin sa panahon ni Arroyo giwagtang kini resulta na hinoon ang pagtuyhakaw sa mga insidenteng krimen.
Dugang ni Abellera nga mao na kini ang tukmang panahon aron banhawon ang silot-kamatayon aron sa ingon wala na unyay mabiktima pa sa kamot sa mga kriminal nga walay Ginoo ug lulong kun adik sa droga.
Alang sa konsehal, wala na’y lain pang medyos sa pagsanta ug paghadlok ngadto sa mga kriminal gawas lamang sa pagbaton ug pagpatuman sa death penalty lukop sa kapupud-an sa Pilipinas.
Wala makalingkawas ang mga taga-oposisyon ug mga kritiko sa batikos ug pagpuna ni Abellera nunot sa padayon nga pagsupak ug pagsaway sa mga kritiko sa gustong mahitabo sa Duterte administration nga mahibalik ang silot- kamatayon sa nasud aron magsilbing deterrence sa gitawag nga mga heinous crimes.
RadyoMaN Joel Viray
