Davao City – Daku ug ikatabang sa pagpakunhod sa krimen kung subling banhawon ang silot-kamatayon dinhi sa nasud sa Pilipinas nga ipahamtang ngadto sa mga kriminal nga nakahimo ug grabeng sala.
Sumala ni Barangay Kapitan Carlos del Rosario sa Barangay Sto. Niño, Tugbok disrict sa siyudad Davao nga pabor siya kun ipabalik ang death penalty sa nasud ug kini lang nga paagi aron mukunhod ang krimen.
Nagtuo si del Rosario nga kung hingpit ipatuman ang silot-kamatayon posible nga mubaba ang krimen ug daghan usab mangahadlok nga mga kriminal.
Apan alang kang Barangay Captain Remegio Licera sa Brgy. Lizada, Toril, nga dili siya supak sa maong balaud apan ang angay lamang silotan pinaagi sa death penalty kadto lamang nakahimo ug makalilisang nga krimen sama sa pagpanglugos, samtang giingon usab niini nga mapabalik ang silot-kamatayon alaut lang kadtong pobre nga masintensiyahan nga bisan ang sala gaan ra sanglit napilde sa kaso.
RadyoMaN Don Pulayao
