Davao City – Suportado sa Philippine Drug Enforcement Agency (PDEA-XI) ang pag-amyenda sa balaud-kriminal aron butangan og probisyon sa silot-kamatayon ang balaud nga itagana alang sa mga druglords.
Sumala ni Spokesperson Noli Dimaandal, silot-kamatayon lamang ang makapalisang sa mga sakop sa sindikato sa droga aron mapugos sila og hunong sa ilang operasyon ug hingpit mubiya sa Pilipinas.
Pabor si Dimaandal nga silotan og kamatayon ang druglords ingon man ang ilang mga galamay nga responsable sa pagpakuyanap sa ilegal nga droga sa tibuok nasud.
Paborito sa mga sindikato sa droga ang nasud tungod kay walay death penalty ang Pilipinas ug kung madakpan ug mahukman silang guilty sa korte, igo ra sila mapaslak sa prisohan.
Gihimong ehemplo ni Dimaandal ang sitwasyon sa China diin walay sindikatong nangahas sa pagsugod og operasyon sa ilegal nga droga gumikan sa silot-kamatayon nga nagpatigbabaw sa maong nasud.
Kumbinsido si Dimaandal nga hingpit lamang matuldokan ang problema sa droga sa Pilipinas kunga dunay silot-kamatayon nga ipahamtang ngadto sa mga makumbiktong druglords ingon man ilang mga ginsakpan kun mga hinanib.
RadyoMaN Joel Viray
