Davao City – Gisupak karon ni Bishop Dr. Ariel Coleto ang debosyon sa mga Pilipino sa Black Nazarene uban ang pag-ingon nga usaka blasphemy ang pagsandig sa pagtoo niini ug kini gikaligutgotan sa Dios nga imbes kaniya lamang unta musalig ug dili sa mga rebolto.
Matud ni Coleto, ang Black Nazarene dili biblical kay walay makita ug mabasa sa Daan ug Bag-ong Tugon nga sama niini nga tinohoan.
Busa, gipanindugan sa obispo nga usa ka dakung sayop ang pagtoo sa Black Nazarene nga gitudlo sa simbahang Katoliko ug sa mga kaparian ngadto sa mga tawo.
Dugang ni Coleto nga mahigmata ang mga tawo sa kamatuoran ug isalikway ang pagtoo sa mga imahe samtang wala pa giyagyag sa Dios ang iyang kapungot sa kalibutan.
Kahinumdoman nga nahimong kolonya sa Espanya ang Pilipinas sulod sa 300 ka tuig kun tulo ka siglo human miabot sa nasud ang expedition ni Portuguese explorer Ferdinand Magellan niadtong 15th century.
Midunggo ang sakyanang pandagat ni Magellan sa isla sa Homonhon nga karon sakop sa Guiuan, Eastern samar niadtong Marso 16, 1521.
Usa sa gisilsil sa mga Kastila sa alimpatakan sa unang mga katigulangang Pilipino mao ang ilang tinohoan ug tradisyon sa simbahan.
Si Rajah Humabon sa Sugbo nahimong suod nga higala ni Magellan, ang unang mihangop sa tinohoan sa mga Kastila hangtud nagpabawtismo sa prayle nga nagpahimo kaniya nga Kristiyano.
Gumikan sa gidugayon nga na-ulipon sa gahum sa mga Kastila ang Pilipinas midulot gayod og maayo ang tradisyon nga tinohoan sa simbahang Katoliko minilyon ka mga Pilipino.
Por ehemplo ani mao ang pagkalunod-patay sa mga Pilipino sa Black Nazarene kung asa magdasok ang daghang mga tawo sa Quiapo Manila aron makahawok sa rebulto atol sa Traslacion matag buwan sa Enero.
Ang mga batid sa history nagsulti nga ang Black Nazarene gi-ukit sa usa ka wala mailhing Mexicano nga eskultor niadtong 16th century diin kini gama gikan sa itom nga kahoy.
Miabot sa Pilipinas ang Black Nazarene Mayo 31, 1606 pinaagi sa galleon trade nga gikan sa Acapulco sa nasud Mexico kung asa daghan sa mga Pilipino mihangop niini tungod sa pagtoo nga milagroso ang imahe.
Mao nang wa’y sapayan sa mga debutante nga sila mabun-og sa Traslacion basta makahawok ug maka-pahid lang sa imahe.
RadyoMaN Joel Viray
