Davao City – Gibutyag karon ni Second District Councilor Danilo Dayanghirang nga angay mopasaka og pormal nga reklamo ang mga agrabyadong residente sa Deca Homes Indangan ug uban pang locations niini aron resolbahon ang ilang mga yangungo kontra sa maong housing developer ug sa water service provider niini.
Sa interview sa DXDC 621 RMN Davao, gisugilon ni Dayanghirang nga hagbay rang miabot sa Davao City Water District (DCWD) ang problema ug sa Housing and Land Use Regulatory Board (HLURB) Manila kinsa nakahimo na og imbestigasyon kaniadto kalabot niini.
Sa post sa Deca Homes Indangan Official Group, gi-post sa usa ka na unsyameng homeowner ang iyang balde nga adunay tubig gikan sa gripo sa BP Waterworks nga hastang ka yellow ang color niini.
Sa maong post, hugaw nga tubig-mainom ug kadaku sa bayronon kun water bills karong bulana maoy pipila sa gipalanog nga mulo ug reklamo sa mga agrabyadong homeowners sa Deca Homes partikular sa BP Waterworks nga maoy service provider nila.
Partikular gitiyabaw sa mga disillusioned homeowners ang hilabihang kadaku sa ilang bayronon sa tubig karong bulana diin makita sa water bill sa usa ka konsumante ang pagsutoy sa bill nga miabot og P2,513.62 tanan.
Tungod niini, nagkahiusa ang gatusan ka mga homeowners sa Deca Homes sa Indangan ug uban pang lokasyon nga moduso og petisyon batok sa BP Waterworks.
Sa gihimong inquiry sa DXDC RMN Davao, mibalibad ang BP Waterworks sa pagtubag sa sentimyento sa ilang mga konsumante sa Deca Homes sa rason nga wala ang ilang supervisor niadtong tungora.
Tambag pa sa BP Waterworks sa mga homeowners nga mas maayong moduso og pormal nga reklamo sa ilang buhatan kabahin sa kahugaw sa tubig ug kadaku sa bayrunon.
Dugang pa usab sa konsehal sa segundo distrito nga bugtong makasulbad sa problema sa supply ug quality sa tubig sa Indangan mao ang Tamugan River Project gani laraw niini nga iya kining hisgotan pag-usab sa hawanan sa Konseho aron sayron ang labing ulahing katikaran sa proyekto sa DCWD.
Tambag ni Dayanghirang ngadto sa mga homeowners nga mosang-at og formal complaint sa Department of Health (DOH), sa City Council Committee on Health o dili ba kaha largo ngadto sa HLURB mismo.
RadyoMaN Joel Viray
