Davao City – Misaka na og 20 ka insidente sa sunog ang natigayon sa siyudad sa Dabaw sud lamang sa duha ka semana karong bulana.
Katapusan miulbo ang sunog sa may Bajada ning syudad ganinang kadlawon kung asa usa ka kan-anan og manok ug kasigbit nga panimay ang naabo human lamya sa kalayo.
Matud ni Bureau of Fire Protection-Davao Senior Fire Officer (SFO 2) Ramil Gillado nga natala ang pinakadakong sunog alang karon nga bulan sa may Diamond Village Matina Aplaya kagahapon adlawa.
Suma ni Gillado, miabot og 1.5 milyon ka pesos ang damyos gikan sa naugdaw nga mga balay, mga behikulo sama sa multicab ug establisimiento.
Nag-una gihapon sa rason sa pag-ulbo sa sunog mao ang electrical short circuit gumikan sa unplugged nga mga appliances ug kabit-kabit sa linya sa kuryente.
Apan giklaro ni Gillado nga walay kalabutan sa short circuits ang mga Christmas lights ug gani wala pa’y natala ang ilang buhatan sa mao nga hinungdan gawas lamang sa miaging buwan.
Sa maong insidente, ubay-ubay ang magselebrar sa pasko nga wala na’y pinuy-anan human nasunog ang ilang mga panimalay sama sa nahitabo sa Country Homes Cabantian sa nakalabay’ng semana.
RadyoMaN Joel Viray
