Gisampulang gubaon kagahapon sa National Housing Authority ang dakung balay ni Mayor Majul Gandamra sulod sa most affected area sa Sector 5 nga naa sa Osmeña Street, Barangay Sangkay, sa Marawi City.
Kini human ang kick off o pormal nga pagsugod sa demolasyon sa mga balay ug mga istraktura nga nangaguba human ang lima ka bulan nga giyera sa gobyerno sa Marawi batok sa mga terorista niadtong 2017.
Matud pa ni Engr. Ikmat Bantuas sa NHA, tumong nilang sugdan ang demolisyon sa balay ni Mayor Gandamra aron maaghat usab ang ubang mga residente nga apilon pag-guba ang ilang mga balay.
Matudtsa NHA, sa 6,800 ka mga istraktura sulod sa 250 ka hektaryang kanhi main battle ground, 409 ka pamilya pa lang ang naghatag og pagtugot nga i-demolish ang ilang mga kabtangan sa sulod.
Daghang mga residente ang mahadlok nga ma-demolish ang ilang mga balay, tungod sa pagtoo nga mawala kini nga hingpit gikan kanila o kaha dili na sila makabalik pa.
Gisiguro sa gobyerno nga adunay gipahigayong survey ug social cartography ug aduna nay mga geo-tagging ang matag luna aron mapuy-an kini’g balik sa mga tag-iya.
Ang demolasyon sulod sa most affected area mao ang pormal nga pagsugod sa pisikal nga rehabilitasyon sa Marawi City. (Dvina M. Suson)
