Davao City- Atol sa gipahigayong ‘Pulong-Pulong sa Konseho’ sa nakalabay’ng semana, gipresenta ni First District Councilor Edgar Ibuyan, Jr. ang listahan sa mga istruktura sa Davao City nga nangaliki tungod sa mga linog nga miigo sa Mindanao sa miaging bulan.
Sa datos nga gi-anunsyo ni Ibuyan, nasayran nga sagad sa mga gambalay nga nasutang may liki mga pampublikong tulunghaan maingon man pipila ka buhatan sa lokal nga kagamhanan ug gani, nikabat sa 17 ang girekomendar alang sa demolisyon tungod kay dili na luwas gamiton pa.
Sa pikas bahin, ang maong ideya gidasonan usab ni Bankerohan Barangay Captain ug Association of Barangay Captains (ABC) President Edgar Ibuyan, Sr. sa katarongan nga ang maong istruktura magdala lamang og dili tiaw’ng peligro ngadto sa kinabuhi sa mga okupante niini sama sa mga estudyante kun muigo pag-usab ang makusog nga linog.
Gidasig sa ABC chief ang City Engineers Office nga susihon na ang tanang mga gambalay nga ginatukod pa karon kun nakasunod ba sa standards sa istruktura o wala ang mga developer ug mga contractor aron dili masubli ang nahitabo sa Ecoland 4000 Residences nga nahagsa mugna sa nakalabay’ng linog.
Gi-awhag usab sa barangay federation head ang kagamhanang lokal nga i-relokar na ug ibalhin na ang mga tawong nagpuyo sa mga landslide-prone areas ngadto sa luwas nga dapit nga ilang kapuy-an.
Una niini, kahinundoman nga mismong si PhiVolcs Director Undersecretary Renato Solidum nisugyot nga karon na ang hustong panahon diin susihon gayud ang Bill of Materials sa matag construction applicant sanglit nasayran nga daghan usab diay wala magalukat og Building Permits.
RadyoMaN Joel Viray
