Davao City – Dili i-itolerar sa lokal nga panggamhanan ang hinimuan sa mga sakop sa demolition team kinsa giingong nangawat og mga sapatos sa may Toril ning syudad.
Sa interbyu sa DXDC RMN Davao kang Human Resource and Management Office Head Erwin Alparaque gikanayon niini nga muhimo siya’g imbestigasyon kalabot sa among insidente.
“Nakaabot na ni sa ako, mag-istorya pa mi sa head sa Ancillary Services Unit (ASU) nga si Paul Bermejo kung unsa ni katinuod nga naay nahitabong pagpangawat o panghilabot sa mga butang gikan sa mga ginapamaligya sa mga vendors,” sumala ni Alparaque.
Mamahimong taktakon sa serbisyo ug kasuhan ang maong mga empleyado kung mapamatud-an kini sumala sa opisyal.
“We will immediately terminate them from the service kung job order or contract of service na siya ug kung plantilla pasakaan siya og kaso then tanggalon siya sa serbisyo ug pwede silang ma file-an og criminal case,” segun ni Alparaque.
Pahimangno ni Alparaque sa tanang empleyado sa lokal nga panggamhanan nga magtarong og pagserbisyo sa katawhan ug dili kini sagulan og iligal nga binuhatan.
Kahinumduman nipadangat sa ilang mga reklamo ang mga tindero human nga nawagtang ang ilang mga baligya ug nakuhaan usab sa CCTV footage ang maong grupo sa demolition team kinsa bitbit ang maong mga sapatos.
RadyoMaN Aimee Guinita
