Davao City – Giangkon karon ni Barangay 76-A Punong Barangay Bogart Trajera nga gikapoy na kini sa pagpunay og pahimangno sa iyang mga lumulopyo nga manglimpyo sa ilang tugkaran aron dili mukuyanap ang makamatay nga sakit nga dengue.
Sumala ni Trajera, wala nanumbaling ang iyang katawhan sa pasidaan nga manghinlo sa palibot aron dili mosanay ang lamok nga nagdala sa dengue.
Segun ni Trajera, wala sila magkulang sa programa kontra dengue kay hugot nila kining gipatuman apan ang problema, ang mga tawo wala gayuy igong kooperasyon sa paningkamot sa mga opisyales sa barangay.
Busa, makatarunganon lamang usab nga dili hatagan kun tabangan sa ‘Lingap para sa Mahirap’ Program sa lokal nga kagamhanan ang mga tawo nga walay limpyo-limpyo sa ilang tugkaran ug palibot sa ilang tagsa-tagsa ka mga komunidad.
Gikinahanglan madisiplina ang katawhan sa ilang responsibilidad aron mahalikay sila sa mga balatian sama sa dengue nga makuha gikan sa pa-ak sa lamok nga nagdala sa makamatay nga klase sa balatian.
Gidepensahan sa kapitan ang nahimong lakang sa kagamhanang lokal nga wad-an og katungod sa benepisyo ang mga tawong walay pakialam sa palibot aron makakaon usab og tagam.
Gipamugos sa kapitan nga ang pagtinabangay, pagpakabana, pag-aplikar sa 4’oclock habit ang gikinahanglan karon nga nagpatigbabaw na ang dengue outbreak sa atong dapit.
Subay sa talaan sa Department of Health (DOH-XI), nasuta nga niadtong Hulyo 17, mukabat na sa 3,000 ka mga kaso sa dengue ang natala sa tibuok Rehiyon Onse diin 15 na ang kumpirmadong namatay.
Nag-una ang siyudad sa Davao nga adunay pinakataas nga kaso sa dengue human miabot og 1,630, nag-sunod ang Compostela Valley Province nga dunay 701 ka kaso gisundan sa Davao Oriental nga dunay 562 ka mga kaso.
Una niini, ang kagamhanang lokal sa Island Garden City of Samal (IGaCoS) nag-deklara og State of Calamity niadtong Hulyo 12 tungod kay nasinati na nila ang dengue outbreak.
Kagahapon, ang latest LGU nga nag-deklara og State of Calamity mao ang Tacloban City kinsa gilampornas usab sa maong medical dilemma.
RadyoMaN Joel Viray
