Davao City – Tulo na ang deklaradong patay sugod sa bulan sa Enero hangtod Hunyo karong tuiga gumikan sa sakit nga dengue dinhi sa syudad sa Davao.
Base kini sa datos sa Davao City Health Office diin misaka ang kaso sa maong sakit gikan 665 nga natala sa susamang mga bulan sa tuig 2018 ngadto sa 937 ka mga kaso karong tuiga.
Sumala ni Melodina Babante, Pest Control Worker II sa CHO, patay ang usa ka 84 anyos sa Brgy. 74-A ning syudad ingon man usab ang 8 anyos sa Bunawan District ug 5 anyos sa Toril gumikan sa maong balatian samtang padayon pang ginakumpirma kung dengue ba gayud ang kaso sa duha ka mga gisuspetsahang naigo sa maong sakit.
Gilanayon ni Babante nga posible pang mutaas ang maong kaso gumikan sa nagkadaiyang rason sama sa pagdaghan sa mga lumulupyo sa maong lugar gani muresulta sa pagkaguot sa maong areas, dili maayo nga water system sama sa Cabantian nga kanunay naga pondo og tubig ingon man ang climate change.
Sa pagkakaron nagpadayon ang surveillance sa CHO ngadto sa Dengue hotspots sa syudad nga mao ang Cabantian, Buhangin, Matina Crosssing, 74-A, Catalunan Grande, Wilfredo ug Lapu-lapu sa Agdao, Marilog, Calinan, Talomo Proper, Toril, ug Brgy. 19-B.
Hinuon dugang ni Babante nga mas taas ang ihap sa namatay sa milabay’ng tuig kun itandi karon.
Gani, awhag niini nga angayan batason sa mga lumulupyo dili lang sa syudad apan sa uban pang lugar ang pagpanglimpyo sa palibot sabay sa kampanya sa gobyerno aron mabatukan ang sakit nga dengue.
RadyoMaN Jason Amisola
