Davao City – Mikunhod ang kaso sa dengue sulod sa duha ka quarter karong tuig 2018 itandi sa unang duha ka quarter sa mga milabay’ng tuig 2017 ug 2016.
Sa pinakaulahing record sa Davao City Health Office (CHO), aduna nay 562 ka mga kaso sa dengue ang natala sa unang duha ka quarter karong tuiga samtang 977 ka mga kaso sa 2017 ug 1,890 ka mga kaso sa 2016.
Apan sumala ni CHO Tropical Disease Division head Elizabeth Banzon, posible pang madugangan kini gumikan sa nagapadayong rainy season.
Sa eksklusibong pakighinabi kang CHO head Dr. Josephine Villafuerte, gitino niini nga nagapadayon ang information drive sa tanang pampublikong tulunghaan sa Davao.
“Nag sige na siya (information drive), gi-intensify gani karon kay ug naa tanan atong sakop sa field ug apil na diha sa mga eskwelahan,” segun niini.
Samtang gibutyag ni Villafuerte nga adunay ipahigayong information drive karong Hulyo 3, 2018 sa tanang elected barangay kapitan sa Davao bahin sa hisgutanang panglawas ingon man mga programa sa CHO diha sa kabarangayan.
RadyoMaN Jason Amisola
