“No stone will be left unturned.”
Kini ang giluwatang pasalig karon sa palasyo sa Malacañang mahitungod sa labing ulahing iskandalong gikalambigitan sa mga kadagkuan sa Aquino administration ug sa dengue vaccine manufacturer Sanofi Pasteur.
Sa pakighinabi kaniya sa media, gitataw ni Presidential Spokesperson Harry Roque nga buot karon ni Pres. Rodrigo Duterte nga ipahigayon ang usaka halapad nga pakisusi aron suta-on ang scope or extent sa iskandalong nilutaw kalabot sa P3.6B dengue mass immunization program sa kanhi-ay nga rehimen bunga sa admission sa Sanofi Pasteur, manufacturer sa labing unang dengue vaccine nga ang bakuna posibleng makadaut kun ‘harmful’ niadtong mga bata nga wala pa matapti sa balatian.
Sa pikas bahin, gisugilon ni Volunteers Against Crime and Corruption (VACC) convenor Dante Jimenez nga ilang ikiha ang mga angay manubag sa maong iskandalo gani gipreparahan nila ang pagpasang-at sa usaka class suit versus mga kadagkuan sa rehimen ni kanhi Pres. Beningo Simeon Aquino III ingon man ang vaccine developer nga Sanofi Pasteur.
Nahimong kontrobersyal ang dengue immunization scheme sa dihang nigula ang kabalaka nga gilusad ang kampanya bisan kun kulang pa kini sa ‘required clinical tests.’
Nilutaw usab ang mga alegasyon nga adunay mga nakakwarta sa maong transaksyon gani gidudahan pa nga gipamugos ang P3.6B program bisan pa man sa kakulang sa kumpirmasyon sa efficacy niini.
Nasayran nga sugdan na sa labing madaling panahon ang imbestigasyon sa Department of Justice (DOJ), sa National Bureau of Investigation (NBI) ingon man sa camara baja aron susihon ang nagkadaiyang anggulo sa sugilanon.
Sa pikas bahin, gitin-aw karon ni Health Sec. Francisco Duque III nga usa ka area nga buot nilang suta-on mao ang ‘full disclosure’ sa mga clinical tests, trials and evaluation sa maong bakuna alang sa dengue sa kabatan-onan sa mga tunghaan.
RadyoMan June Duterte
