Davao City – Gitin-aw sa Davao City Health Office (CHO) ang datos sa ihap sa namatay sa dengue dinhi sa dakbayan sa Davao subay sa impormasyon nga nigula sa social media.
Sumala ni CHO Tropical Disease and Control Division Test Control Worker Melodina Babante nga dili tinuod ang impormarsyon nga siyam ang giingong namatay tungod sa dengue sa Maa ning syudad.
“Last December adunay patay sa Maa isa ra pero dili siyam,” sumala ni Babante.
Gitataw niini nga wala usab nila giapil sa rekord ang namatay sa Maa tungod kay dili kini kumpirmadong namatay sa dengue inay tungod sa pneumonia.
Base sa datos sa CHO sa 2018 adunay 1,508 confirmed dengue cases ug 18 usab ang namatay.
Upat ka death cases ang natala sa Brgy. Buhangin, 2 sa Calinan District, 2 sa Brgy. 19-B, 3 sa Toril District, 1 sa Brgy. 9-A, 2 sa Tugbok District, 1 sa Talomo South District, 2 sa Catalunan Grande ug 1 sa Brgy. Leon Garcia Agdao.
Matud niini nga nikunhod og 25% ang ihap sa kaso sa dengue niadtong 2018 itandi sa 2017 nga adunay 1,884 ka kaso sa dengue ug 25 ang patay.
Segun ni Babante nga dako ang nahimong tabang sa libre nga Dengue NS1 test sa matag barangay aron paspas nga madetermina kung aduna bay dengue ang pasyente.
“Ang atoang patay nikunhod siya tungod kay matabang dayon kay once ma confirm man gud through NS1 nga dengue maong madala dayon ang mga pasyente sa hospital,” sumala ni Babante
Naobserbahan sa CHO nga nagapangita na ug mga pamaagi ang katawhan nga inay pasagdan ang mga bote, lata o mga ligid nga itluganan sa mga lamok nga nagdala’g sakit nga dengue ilaha na kining gipang-recycle aron mapuslan.
Segun niini nga naningkamot usab ang matag barangays aron hingpit nga mabatukan ang dengue sa ilahang mga lugar pinaagi sa kanunay nga pagpanglimpyo ug pagtuman sa 4 o’clock habit.
RadyoMaN Aimee Guinita
