Tatlo na ang napatay sa probinsya sang Iloilo bangud sa dengue.
Base ini sa record sang Iloilo Provincial Health Office humalin sang Enero 1 tubtub Pebrero 14, 2019.
Sa lista sang IPHO, naglab-ot sa 396 ang kaso sang dengue sa bilog nga probinsya nga mas mataas ikumparar sa amo man nga period sang nagligad nga tuig nga may yara lamang sang 104 ka kaso.
Angut sini, liwat naman nga ginapabaskog sang IPHO ang kampanya batuk sa dengue kag ginapahanumdum sa publiko ang pag-obserbar sang 4 S sa pagtapna sang nasmabit nga balatian.
Ginaengganyo man sang IPHO sa kabarangayan sa probinsya nga maghiwat sang Aksyon Barangay kontra Dengue.
Ginhatagan pagtamod ni IPHO head Dr. Grace Trabado nga importante ang pag-ugyon kag pagka-aktibo sang tanan agud mapunggan ang pagmuad sang mga lamok nga nagadala sang balatian nga dengue.
