Taliwala sa mainitong diskase gumikan sa Dengvaxia anti-dengue vaccination program sa kanhi-ay rehimen, ni-ganar na karong mga orasa ang Senate Blue Ribbon Committee hearing kalabutan ning kontrobersyal kaayong isyu-sosyal sa atong panahon.
Ubos sa mando ni Committee chair Sen. Richard Gordon, gilatag na sa maong komitiba ang tumong ug tuyo sa paglusad sa maong congressional inquiry aron masabtan ang full dimension sa presenteng suliran, unsay angay interventions nga ipatuman gumikan sa maong medical scandal ingon man kun kinsa ug unsa ang mga tulubagon sa mga hingtungdang mga opisyales sa maayong panglawas sa nilabay ug kanhi-ay rehimen.
Matud ni Gordon, adunay mga dagkung pangalan nga ilang imbitahon kalakip na si former Pres. Benigno Simeon Aquino III kansang administrasyon maoy nag-facilitate sa maong P3.5B mass vaccination program.
Sa unang adlaw sa deliberasyon, nitambong ang usaka inahan giilang si Iris Alpay nga taga Imus-Cavite kinsa adunay 12 anyos nga anak nga na-inject sa Dengvaxia ug nangaliya ngadto sa mga kadagkuan nga atimanon ang ilang kabalaka sa malagmit negatibong implikasyon sa maong bakuna.
Agig tubag, gitino karon ni Health Secretary Fernando Duque III nga human nibutho ang isyung Dengvaxia scandal or anomaly, gilayon ilang gi-operationalize ang usaka Dengue Hotline alang sa mga dengue-stricken areas diin na-locate ang mga batang na-inject sa maong bakuna ingon man ang pag-mobilisar sa gitawag nga ‘heightened surveillance’ sa mga posibleng insidente sa dengue outbreak.
Matud ni Duque, mokabat sa 830,000 ‘school-based and community-based students’ ang na-cover sa maong mass immunization campaign diin gibanabanaang mokabat sa 70,000 sa mga bata gikonsidera nga pinaka-bulnerable nga mataptan na hinoon sa gitawag nga ‘severe dengue strain.’
Gitino usab sa kalihim sa kasanihan nga ang dengue gikonsidera na karon ‘all-year-round disease’ gumikan sa global warming bunga sa bag-ong phenomenon nga climate change diin nanggula na ang klase-klaseng mga balatian ug bag-ong virus strains nga nag-mutate na ug dili na masayon nga pildihon sa alkontrang mga medical prescriptions.
Usaka representante sa Sanofi Pasteur nitumaw usab sa maong congressional forum aron i-esplikar ang ilang barug o postura sa maong anomaliya nakahatud karon ug tumang kabalaka ug kahadlok nga ang ilang mga anak maigo sa dengue gumikan sa maong kampanyang nahimong kontrobersyal.
RadyoMaN June Duterte
