Davao City – Dagsa ang mga kabanay, higala, kauban sa media nga nihatod sa lubong ni Trends and Time Publisher Dennis Denora sa Panabo Memorial Park karong adlawa.
Anaa usab si Panabo City Mayor James Gamao ug uban pang mga opisyal sa gobyerno.
Gilubong man karong adlawa apan nagpadayon sa pagsinggit og hustisya ang asawa nga si Mary Jane Denora ug mga nahibiling pamilya sa biktima.
Sumala ni Mary Jane Denora nagpaabot sila sa mamahimong resulta sa imbestigasyon sa mga awtoridad.
“Nanghinaot pod ko nga ma-served ang justice sa iyaha kay brutal man gud pagkapatay sa iyaha,” sumala sa asawa niini.
Nagpasalamat kini sa tanang nitabang sa ilang pamilya.
“Nalipay gani ko kay nidako na ang reward money unta makahatag unta na nga naserved gyod ang justice. Nalipay ko kay daghan diay nagmahal sa akong bana,” sumala niini.
Wala usab kini nakauyon sa nigula nga anggulo nga love triangle kay sumala niini gutuis na ang isyu sa kamatayon sa iyang bana.
“No, wala, ginakuan nila ba gina muddle nila, ginadivert nila ang attention sa real issue,” segun sa ni Mary Jane.
Samtang niabot na sa P1.2M ang giandam nga ganti nga natigom gikan sa gobyerno ug mga higala sa media man kinsa makatudlo sa mga responsable sa kamatayon niini.
Sa interbyu usab sa DXDC kang Panabo City Mayor James Gamao, gipasalig niini ngadto sa pamilyang Denora nga himuon nila ang kutob sa ilang makaya aron madakpan ang mga nipatay sa media man.
“Sakit lang ba kay na-sacrifice ang life ni Dennis for that purpose to gain our freedom of press,” sumala sa alkalde.
Matud ni Gamao nagpabiling gihapong luwas ang Panabo alang sa tanang reporters taliwala sa insidente.
RadyoMaN Aimee Guinita
