Davao City – Hustisya ang singgit karon sa kabanay ni Trends & Time Newspaper publisher Dennis Denora kinsa gipusil-patay sa may Century Bank, National Highway, Brgy. New Pandan, Panabo City kagahapong adlawa sa wala pa mailang mga suspek.
Sa interbyu sa DXDC RMN Davao sa anak sa biktima nga si Dennis Rotchmann Denora gilantaw niini nga posibleng may kalambigitan sa trabaho ang hinungdan sa pagpatay sa iyang amahan.
“Work related kay wala koy nadunggan nga nga naa siyay kabangi personal,” sumala niini.
Matud niini nga iyang susihon ang cellphone sa iyang amahan kung adunay nadawat nga hulga pinaagi sa text.
Gibutyag niini nga aduna silay ginalantaw nga mga posibleng nagpaluyo sa krimen apan wala na kiniy naghatag pa og dugang detalye.
“Sa nagpatay, sa nagsugo kita-kita ra ta,” sumala niini.
Dugang sa tagtungod nga didto na nila hayaon ang biktima sa ilang panimalay sa may Brgy. New Pandan, Panabo City.
Nanghinaot usab ang pamilyang Denora nga masulbad kini sa kapulisan ug matabangan sila nga makab-ot ang hustisya sa kamatayon sa biktima.
RadyoMaN Aimee Guinita
