Davao City – Mas gipahugtan pa karon sa Department of Environment and Natural Resources (DENR) ang ilang kampanya batok sunog labi na kung maapektuhan niini ang kinaiyahan nga maoy ginatutukan sa departamento.
Sa pakighinabi sa DXDC RMN Davao kang Nestor Pilotos, Office in charge sa DENR-Lupon, gidasig niini ang katawhan nga mo-kooperar sa maong kampanya labi na nga aduna nay mga natalang forest fires dinhi sa Davao region.
Saysay ni Pilotos nga angay mag- igmat ang publiko labi na nga daghan og mga hinungdan ang forest fire diin nag-una niini ang kainit sa panahon ingon man camping fire, kaingin ug uban pa.
Sa karon, padayon ang pagpahigayon sa DENR og mga trainings sa mga forest rangers ingon man nakipag-alayon usab sila sa mga local government units (LGUs) ug mga local sectors aron mapahibalo ang publiko labot sa paglikay niini.
“I-continue nato ang effort sa pagprotekta sa atong kinaiyahan. Gi-awhag nato ang atong katawhan nga magsuporta gyud kanunay. Gitagaan man ta sa Dios og resources, ato pong protektahan.” segun niini.
Nagpasalamat usab ang opisyal sa DXDC RMN Davao nga nahimong instrumento sa pagpakatag sa impormasyon sa pagpakusog pa sa kampanya kontra sunog.
RadyoMaN Kirby Manzon
