Ginaduso sang Department of Health ang pagpahamtang sang measles fastlane kag isolation room sa mga hospitals diri sa syudad sang Iloilo.
Suno kay Dr. Marlyn Convocar, DOH-6 Regional Director, katuyuan sini nga mangin madasig ang pag-atipan sa mga may sakit nga tipdas kag malikawan ang paglapta sang virus sa sulod sang hospital.
Ang fastlane amo ang magahatag sang gilayun nga pagtatap sa mga pasyente nga may tipdas.
Isa lang ini sa mga gilayun nga tikang sang DOH, kasunod sang measles outbreak sa Region 6.
Kadungan sini ginpanugyanan man ni Convocar ang mga ginikanan kag guardians nga gilayun dal-on sa hospital ukon health centers ang pasyente kun makitaan sang sintomas sang tipdas nga amo ang hilanat, ubo, pagpula sang mata, pagtulo sang sip-on kag rashes.
Sa record sang DOH may pulo na ka confirmed cases sugod Enero 1 tubtob Pebrero 2 kun sa diin walo diri ang wala nabakunahan samtang ang duha indi matumod ang ila immunization status.
Ang DOH, may masobra na sa 150 ka measles cases sa rehiyon.
