General Santos City–Gipaklaro ni DEPED-12 Regional Director Allan Farnazo nga magpabilin pa gihapon ang ilang anunsyo nga sa Agosto 24 ang pag-abli sa klase alang sa school year 2020-2021.
Sumala pa ni Farnazo nga dunay lakang karon ang kongreso nga i-postpone ang klase karung tuiga tungod sa covid 19 apan naga-depende kini unsa ang mamahimong desisyon sa kamara.
Saysay pa sa opisyal nga sa bahin sa Deped dili pa sila maka-anunsyo ug bag-ong petsa hangtod nga dunay bag-ong balaod nga magsuporta sa maong ahensiya.
Dugang pamahayag ni Farnazo nga gisunod lamang sa Deped kung unsa ang anaa sa balaod nga mao ang ilang gi-basehan sa ilang anunsyo.
Ma-usab lang matud pa ang anunsyo sa Deped kalabutan sa petsa sa pag-abli sa klase kung dunay kabag-ohan nga mahitabo. Gitin-aw usab ni Allan Farnazo nga wala gipugos sa Deped ang mga ginikanan sa pagpa –enroll sa ilang mga anak gumikan kay ila man kining desisyon.
Nasabtan usab niini nga dili sayon nga mo-adjust sa new normal nga sitwasyon tungod sa Covid-19 apan dunay gihimong pamaagi ang Deped aron lamang mapadayon ang edukasyon sa mga kabataan.
Awhag sa opisyal ngadto sa mga ginikanan nga makigtambayayong na lamang kanila aron mapadayon ang edukasyon sa ilang mga anak luyo pa man sa gi-atubang karon nga problema sa nasud.(RV)
