Davao City – Disi sais anyos na sukad gisugdan sa Department of Education (DepEd) ang ‘Brigada Eskwela’ program kun National Schools Maintenance Week diin ang tanang pampublikong tulonghaan sa elementarya ug sekondarya uban ang minilyon ka mga volunteers sa tibuok nasud dungan mupartisipar sa usa ka semana nga aktibidad.
Gihimo ang ‘Brigada Eskwela’ aron salbaron ang himalatyon na nga espiritu sa ‘bayanihan’ kun kinaraang kinaiya sa mga Pilipino diha sa pagtinabangay nga gi-ugmad sa mga katigulangan pila na ka siglo ang nakalabay.
Matawag nga Social Responsibility ang Brigada Eskwela nga ang tanan angay musalmot sa pag-andam sa mga tulonghaan ayha paman muhikyad ang buwan sa hunyo, matud ni reelected 1st District Councilor Mabel Acosta.
Sumala ni reelected City Councilor Mabel Sunga-Acosta, matag ‘Brigada Eskwela’ matag tuig aktibo kini naga-apil sa paghinlo, pag-ayo sa mga gubaon nga lingkuranan ug uban pa, pagpintal, pagpanghagbas og sagbot ug uban pa ug gani apil sa iyang na-engganyo sa maong kalihukan mao ang kanhi mayor ug karon Pres. Rodrigo Duterte kuyog ang uban pang mga empleyado sa kagamhanang lokal.
Dili lamang kusog ug oras ang libreng gidalit sa minilyon ka volunteers gikan sa lahi-lahi nga sector sa katilingban apan lakip usab ang ilang salapi ilang gi-donar pinaagi sa mga gamit nga ilang gipalit sama sa pintura, martilyo, lansang ug daghan pang uban.
Bisan tuod og dili na Committee on Education chairperson sa Konseho ang konsehala, walay paltos ang iyang pag-apil sa ‘Brigada Eskwela’ matag tuig sa tinguha nga makatabang kini sa pag-andam sa mga eskwelahan alang sa haruhay nga pagtungha sa mga estudyante karong bulan sa Hunyo.
Nakita sa konsehala nga dili kaya sa DepEd lamang ang pagprepara sa mga tulonghaan kung sila lang ang mubuhat niini busa daku kaayong tabang sa maong ahensiya kung makigduyog ug makighiusa ang katawhan ug ang ubang sektor kun education stakeholders sa usa ka semana nga akbitidad.
Hinoon, nasabtan ra sa local lady legislator ang ubang mga ginikanan nganong dili sila makaapil sa ‘Brigada Eskwela’ apan gidapit niini ang walay himoon nga magpakabana ug musalmot sa maong kalihukan karong tuiga.
Laing bahin, gibatbat usab ni Acosta nga matag tuig, dili gayod mawala ang suliran sa kakulang sa bangko, libro ug magtutudlo ug gani mas nag-patong patong pa kini apan ang lokal nga kagamhanan naghatag na og counterpart sa pagsulbad sa maong problema.
RadyoMaN Joel Viray
