Davao City – Dako sumala pang kadaugan sa hustisya ang pagkasikop sa prime suspek nga giingong responsable sa pagpatay sa Grade 9 student nga si Christine Lee Silawan, 16-anyos nga taga Bangkal, Lapu-lapu City, Cebu.
Kini ang gibutyag ni Jenielito “Dodong” Atillo ang spokesperson sa Department of Education (DepEd)-XI sa pakighinabi sa DXDC RMN Davao.
Saysay ni Atillo nga kung mapamatud-an nga ang na-arestong suspek maoy responsable sa krimen angay niining atubangon ang tukmang kaso subay sa balaod.
“Kung kinsa man tong nagpaluyo ani, kinahanglang busdakan gayud sa pinaka bug-at nga silot sa balaod. Angayang ipakanaug gyud ‘tong pinakabug-at nga hustisya kay hilabihang kangilngig ang krimen nga nahitabo.” segun niini.
Gisalig na usab sa DepEd official sa awtoridad ang proseso sa balaod sama sa pag presenta sa lig-on nga ebidensya batok sa suspek.
Kahinumduman nga bag-ohay lamang, na-aresto sa National Bureau of Investigation (NBI)-7 ang menor de edad usab nga suspek nga nag edad og 17-anyos sa pinuy-anan niini sa Maribago, Lapu-Lapu City, Cebu.
RadyoMaN Kirby Manzon
