Davao City – Gipaniguro sa Department of Education (DepEd) nga magbaton og sistema partikular na ang contact tracing batok Coronavirus Disease 2019 (COVID-19) oras nga i-pilot na ang face-to-face (F2F) classes nga himuon sa Nobyembre 15, 2021.
Atol sa DepEd-XI Regional Press Conference nga gipangunahan mismo ni Secretary Leonor Briones, gisaysay niini nga aduna nay mga insidente karon nga dunay mga estudyante nga nagpositibo sa COVID-19 bisan og wala pa ang F2F classes, rason nga posible kining mahitabo sa pagsugod sa klase, apan kini angay pangandaman.
Gipasabot ni Briones nga mamahimong makuha sa mga bata ang COVID-19 sa panimalay, sa public transportation o sa bisan asa man, rason nga magbaton og paspas nga contact tracing ugaling kini mahitabo.
“Mayroon tayong tinatawag na contingency plan sa bawat eskwelahan. Kung sakali man may ganong klaseng pangangailangan, the exact steps are already outlined. Kasi, we have to recognize that like it or not if such accidents happen, they have to prepared as there are now isolated instances even without face-to-face (classes),” sulti ni Briones.
Dugang sa DepEd Secretary nga kinahanglan lang nga mapatuman ug masunod ang minimum public health standards sa F2F classes, ug ang pagsigurong vaccinated ang mga teaching ug non-teaching personnel.
Dinhi sa Davao Region, anaa sa unom (6) ka mga eskwelahan ang tugotan nga musalmot sa pilot run sa limited F2F classes nga naggikan sa mga probinsya nga minimal o zero cases sa COVID-19.
RadyoMaN Kirby Manzon
