Davao City – Gikatakdang imbestigahan sa Department of Education (DepEd)-XI ang insidente sa pagsulay sa paghikog sa usa ka Grade 11 student sa Daniel R. Aguinaldo National High School (DRANHS) tungod sa maestro niining nang-bully sumala pa pinaagi sa pag-discourage nga dili nalang mo-eskwela tungod sa bagsak nga grado ug ingon man wala pagpirma sa clearance niini.
Gibutyag sa DXDC RMN Davao ni Jenielito “Dodong” Atillo, spokesperson sa DepEd-XI nga manguna sa maong imbestigasyon ang Child Protection Committee sa maong eskwelahan.
Saysay ni Atillo nga mu-agi sa ‘due process’ kun legal nga proseso ang imbestigasyon pinaagi sa paghatag og kahigayonan sa tanan nga makapadayag sa ilang tagsa-tagsa ka mga posisyon.
“Investigation will follow the basic rudiments of due process. This will afford everybody the opportunity to be heard, argue their case and voice their position.” tataw ni Atillo.
Kahinumduman nga personal nga midangop sa DXDC RMN Davao ang ginikanan sa 18-anyos human nga nag ‘suicide attempt’ ang ilang anak pinaagi sa pag-inom og pesticide diin gilayon kining gidala sa Southern Philippines Medical Center (SPMC) ug gitambalan.
RadyoMan Kirby Manzon
