TACLOBAN CITY – Nananawagan an Department of Education (DEPED) ha mga kamaistrahan nga gamiton iton teknolohiya para maibanan iton stress, ini in matapos nga magpakamatay an usa nga maistra ha Leyte tungod han “paper works.”
Sumala kan DEPED-Leyte Assistant Division Superintendent Edgar Tenasas, an nahinabo nga suicide incident in usa nga wakeup call para ha mga public shool teachers nga mahibaro pagmanage han work pressures.
An paghimo hin mga reports ngan pagpreparar hin lesson plans in parte daw ha trabaho hiton mga kamaistrahan.
Nagreact gihapon an opisyal matapos nga kumalat ha social media nga an nagin rason han pagpakamatay ni Teacher Emylou Malate, 21 anyos in tungod han mga paper works, nagsuicide an mao nga maistra ha sakob han ira panimalay ha Barangay Limba, La Paz, Leyte dida han July 14.
An mga sangkay ni Teacher Emylou in naghimo hin facebook page nga may ngaran nga “Justice For Teacher Emylou”. An pinaka-latest hini nga post in umabot ha 66,000 shares ngan sobra 17,000 nga comments dida han myerkules han aga.
Aminado an opsiyal nga apektado an bug-os nga DEPED-Leyte Field Office nga may 15,000 teachers nga naka-assign ha 1,107 elementary schools, 149 secondary schools ngan 126 senior high schools nga ha 40 nga bungto.
Ini na an ika-duha nga insidente nga may nagpakamatay nga Public School Teacher. An syahahan in nai-report dida han Marso kun diin usa gihapon nga babaye an nakit-an nga naghikog ha luyo han classroom ha Leyte National High School dinhi ha Tacloban.
