Davao City – Gipalawman pa sa kapulisan ang imbestigasyon sa pagpusil-patay sa usa ka opisyal sa Department of Education (DepEd) kagahapon sa hapon, December 19, 2019 sa Tadeco road, Panabo City, Davao del Norte.
Sa interbyu sa DXDC RMN Davao kang Police Major Ernesto Gregory, chief of police sa Panabo PNP, giila niini ang biktima nga si Babito Manliguez, 58-anyos, Public Schools District Supervisor sa DepEd Panabo City ug usa ka pastor.
Gisaysay sa pulis nga gikan sa balay ang biktima ug pabalik sa iyang trabaho sakay sa iyang kotse sa dihang kalit na lamang kining gi-atangan ug gipusil sa wala mailhing mga lalaking riding in tandem.
“Gikan sa iyang balay, pabalik na unta sa iyang trabaho. Samtang pasulod na siya sa main road kay sudlonon man ni ilaha, gi-atangan siya, gipusil,” saysay ni Gregory.
Buot karong masusi sa kapulisan ang mga kuha sa closed-circuit television (CCTV) cameras sa duol nga mga establishemento sa lugar aron makit-an ug posibleng maila ang mga responsable sa krimen.
RadyoMaN Kirby Manzon
