Davao City – Kinahanglan mabalanse sa mga magtutungha ang ilahang pagtuon ug pag apil usab sa umaabot nga Davao Region Athletic Association kun DAVRAA 2019.
Sa pakighinabi sa DXDC RMN Davao kang Jenielito “Dodong” Atillo, Department of Education kun Dep-ED Davao spokesperson, gibutyag niini nga mamahimong mag-adjust ang estudyante sa klase sama sa pag-advance sa mga lessons ayha pa ang aktibidad o pag-apas sa mga tun-an pa human sa DAVRAA.
Gipunto sa tigpamaba nga ang paugnat sa kusog usa ka sekondarya ug makadugang lang sa pagtulun-an sa mga bata ug dili gayud pasagdan ang unsa pay makat-unan sulod sa klase.
Apan una na nga gipasabot sa DepEd Davao nga dili maapektuhan ang grado sa mga adlaw nga wala ang estudyante gumikan sa pag-apil og training ingon man sa mga adlaw nga ilusad ang DAVRAA apan pahinumdom sa buhatan nga dili gayud pasagdan ang pagtuon sa aspetong academic.
“And we are actually focusing on education so we have to balance everything, not forgetting the real mission and obligation of DepEd didto sa ilang mga tulunghaan mapa public o private man,” segun sa tigpamaba.
Sa karon, padayong nangandam ang lokal nga gobyerno alang sa maong paugnat sa kusog nga himuon karong January 27 ngadto sa February 2, 2019 dinhi sa syudad sa Davao.
RadyoMaN Renz Barbarona
