Pagadian City—–Ang Department of Education Region 9 Director Dra. Isabelita Borres naghangyo ngadto sa tanang mga ginikanan nga mopartisipar sa pagahimong Brigada Eskwela human kining giablihan Sabado nga adlaw.
Sa pakighinabi sa RMN-DXPR Pagadian gibutyag ni Director Borres nga pormal nilang giablihan ang Brigada Eskwela sa siyudad sa Dipolog og ablihan sab sa tanang mga tunghaan sa tibuok rehiyon 9.
Usa sa mga hangyo sa Deped 9 mao ang pagtabang sa tanang mga ginikanan ilabi na kaayohan sa mga tunghaan ang ilang ginapangayo aron pag-abot sa sugod sa klase karong Hunyo 4 andam na ang tanang mga tunghaan og magsugod na dayon ang klase sa mga tinun-an.
“Dako kaayo ang among pagpasalamat sa tanang mga ginikanan tungod sa ilang matag tuig nga pagtabang sa Deped, nasayod me nga adunay mga trabaho ang mga ginikanan apan migahin gyud sila og panahon aron lang makatambong sa Brigada Eskwela og kana akong dakong pagpasalamat” Matud pa ni Borres.
Apil nga gipasidunggan sa Deped Region 9 mao ang RMN-DXPR Pagadian tungod sa matag tuig nga pagpartisipar sa Brigada Eskwela diin ginapahigayon ang pagpang-apod apod sa mga school supplies, Oplan Pintora ug pagpahatag usab og mga tsinelas sa mga pobreng kabataan.(Mel Coronel/DXPR Pagadian News Team)
