Davao City – Gitin-aw karon sa Department of Education (DepEd) Davao Region nga walay moral nga obligasyon ang lokal nga kagamhanan siyudad sa Dabaw sa paghatag og allowances nga gipangayo sa mga magtutudlo nga sakop sa ACT Teachers Davao.
Sumala ni DepEd-XI Spokesperson Jenielito ‘Dodong’ Atillo nga walay obligasyon ang kagamhanang lokal sa paghatag sa tag-P2,000 nga allowance ug usa ka sakong bugas sa mga magtutudlo nga miyembro sa maong grupo..
Gipasabot ni Atillo nga ang mga magtutudlo ubos sa nasudnong buhatan ug dili sa lokal busa dili mapugos sa ACT si Mayor Inday Sara Duterte-Carpio nga muhatag sa ilang gipangayo.
Wala matud pa’y kagahum ang DepEd sa pagbadlong sa ACT Teachers Davao tungod kay gawasnon silang mupasibaw sa ilang yangungo isip independiyente nga organisasyon.
Pikas bahin, girespeto ni Atillo ang gipagawas nga pamahayag ni Mayor Inday nga kaalyados sa mga terorista ang mga magtutudlo nga namiyembro sa ACT Teachers Davao.
Nag-ugat ang pag-ulbo sa kasuko sa presidential daughter human gibatikos kini sa usa ka estasyonan sa radyo sa alegasyong wala pagsanong sa gipangayo nga allowances sa mga magtutudlo sa niaging semana.
RadyoMaN Joel Viray
