Davao City – Gipasabot karon sa Department of Education (DepEd) nga dako ang responsibilidad sa mga ginikanan diha sa ilang mga anak aron malikay ang nahisgutan sa mga dili maayong sitwasyon sama na lamang sa teenage pregnancy nga usa sa mga seryusong problema nga gina-atubang sa komunidad.
Sa interbyu sa DXDC RMN Davao kang Jenielito “Dodong” Atillo, spokesperson sa DepEd-XI, gibutyag niini nga diha magsugod sulod sa panimalay ang maayong pamatasan o kinaiya sa pagpanguna sa mga ginikanan.
“Kinahanglang lig-onon gyud nato ning disiplina, pagmahal, pagpangga sulod sa pamilya before we will go out to the schools,” saysay ni Atillo.
Saysay ni Atillo nga makita pag-abot sa eskwelahan kung unsa nga sitwasyon naa ang usa ka bata sa ilang panimalay diin negatibo usab ang epekto niini kung huyang ang pondasyon gikan sa pamilya.
“Pero kung huyang naa daan didto, ang panimalay gubot. Pag-uli sa bata imbes gugma ang iyahang masinati o bati-on kagubot naman hinuon, dako ang tendency nga ang bata madala sa negatibong mga pwersa sa komunidad,” dugang ni Atillo.
Nasayran nga ang dakbayan sa Davao ang mitala og pinakataas nga ihap sa teenage pregnancy kung itandi sa ubang mga probinsya sa region eleven.
RadyoMaN Kirby Manzon
